സത്യത്തില് ഇത് മനോരമ തന്നെയാണോ പറയുന്നത് എന്ന് അത്ഭുതം തോന്നി. യു.ഡി.എഫിനെ എക്കാലത്തും കണ്ണിലെ കൃഷ്ണമണി പോലെ സൂക്ഷിച്ച മനോരമ. വിദ്യാലയങ്ങളില് സമരം ചെയ്യുന്നവരെ വെടി വെച്ച് കൊല്ലണം എന്ന് ഇടയ ലേഖനം ഇറക്കിയ മനോരമ ഇപ്പോള് വിദ്യാഭ്യാസ മേഖലയിലെ ഈജിയന് തൊഴുത്തിനെതിരെ എന്താണ് പ്രതികരിക്കാത്തത് എന്ന് പൊതു സമൂഹത്തോട് ചോദിക്കുമ്പോള് എന്റെ തലമുടി പോലും രോമാഞ്ചം കൊണ്ട് ഫ്രീക്കന് ആകുന്നു. സ്വാശ്രയ മേഖലയിലെ ചൂഷണത്തെയും കെടുകാര്യസ്തതയെയും കുറിച്ച് അലമുറ ഇടുമ്പോള് ശരിക്കും എന്റെ ചങ്ക് തകര്ന്നു !
എന്തായാലും പ്രശ്ന പരിഹാരത്തിന് വേണ്ടി പാഴൂര് പടി വരെ പോകാതെ തന്നെ അരിയാഹാരം കഴിക്കുന്നവര്ക്ക് കാര്യം പിടി കിട്ടി. കഴിഞ്ഞ അഞ്ചു വര്ഷം ലീഗാണ് വിദ്യാഭ്യാസ മന്ത്രി. അതിനു മുന്പ് എം. എ ബേബി . അതിനു മുന്പേ വീണ്ടും ലീഗ്. ചുരുക്കം. മെത്രാന്മാരുടെ കയ്യില് നിന്ന് വിദ്യാഭ്യാസം പോയിട്ട് പതിറ്റാണ്ടുകള് പോയിരിക്കുന്നു. ഇതെങ്ങിനെ മനോരമക്ക് സഹിക്കും ? അല്ലെങ്കില്, പഞ്ചായത്ത് തിരഞ്ഞെടുപ്പ് അടുത്ത, നിയമ സഭ തിരഞ്ഞെടുപ്പ് പടിവാതിക്കല് എത്തിയ ഈ അവസരത്തില് ഈ വെടി മനോരമ പൊട്ടിക്കുമോ ? അല്ലെങ്കില്, മറ്റു വകുപ്പുകളെ കുറിച്ച് സത്യസന്ധമായി ഇതുപോലെ എഴുതാന് മനോരമ മിനക്കെടുമോ ? ലീഗ് തന്നെ ഭരിക്കുന്ന പൊതുമരാമത്തിലെ സ്ഥിതി എന്താണു ? ഇല്ല. ഉണ്ടാകില്ല. കാരണം, ഈ മുഖപ്രസംഗവും, പരമ്പരയും മെത്രാന്മാര്ക്ക് വേണ്ടിയുള്ള ഇടയ ലേഖനം ആണ്.
